Himig

Paano mo nga ipapaliwanag ang ligaya kung ang kasabay nito ay takot?

Paano ba bigkasin ang mga salita kung ito’y minsan ng nagdala ng kirot?

Maaari nga bang lumuha at masaktan dahil sa labis na hatid mong saya?

Sumanib sa akin ang kalagayan at ganap sa isang perya

Halakhak ng damdamin umaagos hanggang sa aking isipan

Sumisipol ng bagong tugtugin at kay gandang musika

Yan ang iyong dulot sa aking pagkatao at buong kalooban

Ang lahat ay tila isang musikero na gustong may ipadinig,

Inaaral na matutunang tumugtog ng kanyang guitara

Nangangapa, sumasabay sa kung saan dalhin ng himig

Yan ay damdamin na tila hindi ko ma-awit sayo ng tama

Ako baga ay parang musmos na sugatan ang tuhod

At ikaw ay bagong kalaro na handang magpasaya dito

Bagamat hindi handa ang puso kong lagi nalang natitisod

Sa labis na ligaya at ngiti na dulot mo, naghihilom muli ito

Ngunit, paano mo ipapaliwanag ang ligaya kung ang kasabay nito ay takot?

Paano ba bigkasin ang mga salita kung ito’y minsan ng nagdala ng kirot?

Maaari nga bang lumuha at masaktan dahil sa labis na hatid mong saya?

Kung ako’y maging handa para sayo, ibibigay mo ba ng buo ang puso mo?

-Jackie Perfinan